İstifadə şərtləri

Bu şərtlər nəyi əhatə edir

İki şeyi: zerb.az saytını və burada açdığın hesabı. Proqramın özü mağazanın kompüterində işləyir — oradakı iş, məlumat və qərarlar sənindir, bu səhifə onların üstündə söz sahibi deyil.

Zerb fiskal həll deyil

Zerb sertifikatlaşdırılmış fiskal həll deyil. Qəbzlər fiskallaşdırılmır. NKA öhdəliyin varsa, o, ayrıca qalır — Zerb onu əvəz etmir və etdiyini iddia etmir. Eyni xəbərdarlıq proqramın öz içində də göstərilir.

Hesab

Bir e-poçt — bir hesab. Parolun sənin məsuliyyətindədir; onu bilən hesaba girə bilir. Hesabı istədiyin an silə bilərsən: düymə hesab səhifəsindədir, dərhal işləyir və heç kimdən icazə istənmir.

Mağazanın məlumatı sənindir — və yalnız səndədir

Satışların, müştərilərin və qiymətlərin bizim serverimizdə yoxdur. Bu, sənin xeyrinədir, amma bir nəticəsi var və onu gizlətmirik: məlumat itsə, biz onu geri qaytara bilmərik — bizdə nüsxəsi yoxdur. Proqram özü 24 saatda bir ehtiyat nüsxə çıxarır, lakin o nüsxə eyni kompüterdədir. Ona görə vaxtaşırı nüsxəni kənar bir yerə — fləşkarta və ya başqa kompüterə — özün köçür.

Ödəniş

Hazırda heç nə satılmır: nə abunə, nə ödəniş sistemi var. Qiymət müəyyənləşəndə saytda görünəcək. Xəbərsiz heç bir ödəniş olmayacaq.

Nə vəd etmirik

Zerb yeni məhsuldur. Saytın və hesab sisteminin fasiləsiz işləyəcəyinə zəmanət vermirik. Proqramı işində istifadə edirsənsə, qərarlar sənindir: kassanı saymaq, hesabatı yoxlamaq və anbarı təsdiqləmək sənin işindir — proqram sənə göstərir, sənin yerinə cavabdeh olmur.

Nə etmək olmaz

Başqasının hesabına girməyə çalışmaq, saytı dayandırmağa yönəlmiş yükləmə yaratmaq, sistemi qırmağa cəhd etmək. Belə istifadə aşkarlansa, hesab bağlanır.

Bu şərtlər dəyişəndə

Dəyişsə, aşağıdakı tarix dəyişir. Köhnə mətni saxlamırıq — səhifə həmişə indi qüvvədə olanı göstərir.

Sual və ya şikayət

Yaz. Cavab verən adam var.

mustafaoglu@gmail.com